प्रधानमन्त्री ओलीका दर्जन लोकप्रिय काम

प्रधानमन्त्री ओलीका दर्जन लोकप्रिय काम

आषाढ २१

नेपाली कांग्रेसका सभापति शेरबहादुर देउवा पक्ष नेकपा एमाले अध्यक्ष केपी शर्मा ओलीको नेतृत्वमा रहेको वर्तमान सरकारलाई ढाल्न दोस्रो पटक फेरि कस्सिएर लागेका छन् । पहिलो प्रयास असफल भएपछि केही समय सुस्ताएका देउवा नेकपा माओवादी केन्द्रलाई साथमा लिएर सरकार ढाल्ने योजनामा छ ।

नेता रामचन्द्र पौडेल समुहको विरोधको विच पनि देउवा भने योजनाबद्ध रुपमा सरकार ढाल्ने प्रयासमा छ । बिश्लेषकहरु भन्छन्, ‘भारतीयहरुको दबाबको कारण पार्टी भित्रकै असहमतिको विच पनि देउवा पक्ष सरकारको बिरुद्धमा लागेका छन् ।’ भूकम्प पीडितलाई राहात र पुनःनिर्माणको कामलाई अगाडी बढाउन नसकेको कांग्रेसको आरोप छ ।

संबिधान जारी भएपछि भारतले नाकाबन्दी लगायो । देश अस्तव्यस्त बन्यो । देशको आर्थिक संरचना ‘प्यारालाईसिस’ जस्नै बन्यो । यस्तो संकटको बीचमा पनि प्रधानमन्त्री ओलीले केही महत्वपूर्ण काम गरे । जसले उनलाई लोकप्रिय बनायो । उनका केही स्वाभिमानी अडान र कदमले गर्दा ओली इतिहासले सम्झीरहने प्रधानमन्त्रीको सुचीमा परिसकेका छन् ।

१) संबिधान निर्माणमा अगुवाई :-
संबिधान जारी गर्नमा ओलीको महत्वपूर्ण र हस्तक्षेपकारी भुमिका रह्यो । ‘प्रधानमन्त्री बन्ने हतारो’को रुपमा आलोचना गरिए पनि संबिधान निर्माण र जारी गर्नमा ओलीको महत्वपूर्ण भुमिका रह्यो । एमाले अध्यक्षको रुपमा पार्टीको सबै शक्ति संबिधान निर्माणका लागि परिचालन गर्नमा ओली सफल रहे । तत्कालिन प्रधानमन्त्री एंव कांग्रेसका सभापति सुशिल कोइरालालाई हतारो मात्रै लगाएनन् बाध्य समेत पारे ।

संबिधान जारी भएपछि सरकारको नेतृत्व एमालेलाई दिने ‘भद्र’ सहमतिको कारण सरकार छोड्नुपर्ने बाध्यताको कारण कांग्रेस संबिधान जारी गर्न ढिलाई गरिहेका थिए । तर, एमालेले सबै दललाई संबिधान निर्माणमा लतारे । पार्टीभित्र नेता माधवकुमार नेपाल समुहको समेत दरिलो साथ पाएपछि उनी यो अभियानमा सफल भए ।

२) भारतीय नाकाबन्दी र हस्तक्षेप विरुद्ध अडान
भारतीय नाकाबन्दीका वेला सरकार बन्दा धेरैको अनुमान थियो, ‘ओलीले कुनै सम्झौता भारतसँग गर्नेछन् र त्यसले नाकाबन्दी खुल्ने छ ।’ तर, त्यो अनुमान विपरित ओलीले भारतसँग देशलाई हानी हुने खालको कुनै सम्झौता गरेनन् बरु ओली सरकारले अन्तराष्ट्रिय मञ्चमा डटेर नाकाबन्दीको कुरा राख्यो । कुटनीतिक माध्यमबाट भारतलाई पछाडी हट्न बाध्य बनायो । उनको अडानको कारण अन्तराष्ट्रिय समुदायमा भारत कमजोर साबित भयो । मोदी र भारतको तिव्र आलोचना भारत र भारतीय संसदमै भयो ।

भारत भ्रमणमा पनि नाकाबन्दी नहटी नजाने घोषणा गरे । नाकाबन्दीको बिचमै भ्रमणको लागि निम्तो पाए पनि गएनन् । नाकाबन्दी हटेपछि गएको भ्रमणमा पनि उनको उच्च सम्मान भयो । आफ्नो भारत भ्रमणका समयमा भारतको विशखापटन बन्दरगाहको सम्झौता गरे । यो नेपालको लागि महत्वपूर्ण निर्णय थियो । भारतसँग स्वाभिमानी सम्बन्ध राख्न सक्ने इतिहासकै स्वाभमानी प्रधानमन्त्रीको रुपमा उनी स्थापित भए । भारतको हस्तक्षेप विरुद्ध उनी डटेर उत्रिए । उनले जनताको पनि साथ पाए ।

३) अन्तराष्ट्रिय समुदायसँग स्वाभिमानी सम्बन्ध
यसअघिसम्म नेपाल विदेशीहरुको प्रयोगशाला जस्तै बनेको थियो । सामान्य नागरिकले सम्म अनुभुत गर्ने गरी विदेशीहरुको हस्तक्षेप हुन्थ्यो । तर, ओली प्रधानमन्त्री भएपछि अन्तराष्ट्रिय समुदायसँग स्वाभिमानी सम्बन्ध कायम राख्न सफल भए । भारतको सन्र्दभमा मात्रै होइन युरोपेली राष्ट्र र अमेरिकासम्म पनि स्वाभिमानी सम्बन्ध कायम राखे । भारतीय प्रधानमन्त्री नरेन्द्र मोदीले नेपाल बिरुद्ध बेलायत लगायत युरोपेली राष्ट्रसँग गठबन्धन गरेर २ पटक विज्ञप्ती समेत जारी गरेपनि ओलीले त्यसको डटेर प्रतिवाद गरे ।

४) मृगौला रोगीलाई निशुल्क ‘डायलोसिस’
पैसाको अभावमा मृगौला रोगीहरुले ‘डायलोसिस’ सेवा लिन नसकिरहेको सन्र्दभमा मृगौला रोगीहरुलाई ‘डायलोसिस’ निःशुल्क हुने निर्णय गराएर महत्वपूर्ण काम गरे । मृगौला खराव भएर अस्पतालमा उपचार गराउँदा जग्गा जमिन वेच्नुपर्ने नेपालीको वाध्यता रहेको अवस्थामा यो निर्णय महत्वपूर्ण हो ।

नेपालमा वर्षेनी ३ हजार मृगौलाका नयाँ रोगी थपिने गर्छन् । मृगौलाले काम गर्न छोडेपछि महँगो र लगातार उपचार गराईरहनु पर्ने हुन्छ । ‘डायलोसिस’ गर्न होस् वा मृगौला प्रत्यारोपण, धेरै महँगो र झन्झटिलो प्रक्रिया हो । नेपालका प्रायःजसो अस्पतालमा एकचोटी हेमोडायलायसिस गर्न ४ देखि ५ हजार लाग्छ । नेपालमा वर्षेनी ३ हजार मृगौलाका नयाँ रोगी थपिन्छन् । मृगौला बिग्रिसकेपछि केहि समय हेमोडायलासिस गरे पनि मृगौला फेर्नुको बिकल्प हुन्न । तर, मृगौला प्रत्यारोपण अहिले पनि धेरै नेपालीका लागि आर्थिक हिसावले कठिन र कम सेवा पाईरहेको क्षेत्र हो ।

५) चीनसँगको पारवहन सम्झौता
कुनै सरकारले गर्न नसकेको चीन सँग पारवहन सम्झौता गरेर उनले इतिहासमा महत्वपूर्ण काम गरे । यसले नेपालमा रहँदै आएको भारतमाथिको एकाधिकार मात्र तोडिएन ओलीले ‘नेपाल सार्वभौमसत्ता उपयोग गर्न स्वतन्त्र छ र भारतको मात्र एकाधिकार चल्दैन’ भन्ने सन्देश एकै पटक दिए ।

६) चीनसँग कसिलो सम्बन्ध
चीन भ्रमणका वेला प्रधानमन्त्री ओलीले चीनसँग लगानी, रेलमार्ग, पेट्रोलियम पदार्थ, सडक तथा पूर्वाधारका थुप्रै विषयमा सम्झौता गरे । ओलीको यो कामलाई भारतीय मिडियाहरुले समेत मोदीलाई ओलीको चुनौती शिर्षकमा नेपालका अहिलेसम्मकै शक्तिशाली प्रधानमन्त्री भनेर समाचार सम्प्रेषण गरे ।

नेपाल ‘भारतवेष्ठित’ अवस्थाबाट साँच्चीकै भुपरिवेष्ठित मुलुकको अवस्थामा स्थापित भयो । नेपालको समृद्धि र स्वतन्त्रतामा सधै सकरात्मक व्यवाहार राख्ने चीनसँगको सम्बन्ध नयाँ शिराबाट अघि बढ्यो । यही कारण चिनियाँ राष्ट्रपति सी जिनपिङ नेपाल भ्रमण गर्न तयारी सुरु भएको छ । सी जिनपिङको भ्रमण ताका २ देशविच दिर्घकालिन सकरात्मक असर पार्ने सम्झौता हुने बताईएको छ ।

७) वृद्ध भत्तामा दोव्वर बृद्धि
एमालेले नै वृद्ध अवस्थामा रहेका नागरिकहरुलाई राहात प्रदान गर्ने कामको सुरुवात गरेको हो । २०५१ सालमा मनमोहन अधिकारीको नेतृत्वको एमाले सरकारले एक सय रुपियाँ प्रति महिना वृद्धहरुलाई भत्ता दिएर सुरु गरिएको वृद्धभत्तालाई उनले २ हजार पुर्याए । यसअघि वृद्धभत्ता एक हजार थियो ।

८) द्रूत मार्ग निर्माणमा निर्णायक पहल
राष्ट्रिय गौरबको काठमाडौं–निजगढ द्रूत मार्ग सरकार आफैले निर्माण गर्ने निर्णयले प्रधानमन्त्री ओलीलाई थप लोकप्रिय बनाएको छ । यसअघि तराई–मधेस द्रूत मार्ग नेपाल सरकारले बनाउने कि विदेशी लगानीकर्ता कम्पनीलाई जिम्मा दिने भन्ने विषयमा ठूलो विवाद थियो ।

संसदको बिकास समितिमै सांसदहरुवीच मत बाझिएको थियो । खासगरी कांग्रेस निकट सांसदहरुको मत भारतीय कम्पनीलाई दिनुपर्ने भन्ने थियो । यसो गर्दा सरकारभन्दा विदेशी लगानीकर्ता बलियो हुने, नियम कानुन नमान्ने अवस्था आउने र आयोजनाको समय र लागत पनि बढ्ने धेरैको मत थियो । भारतीय कम्पनी आइएलएस एन्ड एफएसलाई विस्तृत परियोजना प्रतिवेदन (डिपिआर) पेस गरेर यसको अध्ययन भइरहेको अवस्थामा उक्त कम्पनीलाई निर्माण ठेक्का नदिने हो भने भारतसँगको सम्वन्धमा झन ठूलो समस्या आउने अनुमान गरिएका बेला सरकारले उक्त द्रूत मार्ग आफै बनाउने हिम्मत गरेको हो ।

९) शैक्षिक प्रमाणपत्रका आधारमा युवाहरुलाई ऋण
ओली सरकारले गरेको यो निर्णय युवा विद्यार्थीहरुबीच लोकप्रिय निर्णय हो । अध्ययन सक्किएपछि वेरोजगार हुने र शैक्षिक प्रमाणपत्र दराजमा थन्काएर वैदेशिक रोजगारमा जानुपर्ने युवाहरुको वाध्यतालाई हटाउन र लगानीको अभावमा वेरोजगार हुन नपरोस भन्ने उद्देश्यका साथ गरिएको यो निर्णय युवा विद्यार्थीबाट स्वागत गरिएको निर्णय हो ।

१०) तुइन विस्थापन
प्रधानमन्त्री ओलीले पदभार सम्हाले लगत्तै गरेको पहिलो निर्णय थियो– जोखिमपूर्ण यात्राको साधन मानिएको तुइनलाई देशभरबाट विस्थापन गर्ने । घोषणा गरे अनुरुप तुइन विस्थापनको काम तीव्ररुपले अघि बढेको छ ।

तुइन विस्थापन कार्यक्रमअन्तर्गत चितवनमा रहेका तीनवटा तुइन विस्थापित भइसकेका छन् भने देशभरमा १ सय ५५ वटा तुइनलाई ०७४ भदौ महिनासम्म झोलुंगे पुलहरुद्वारा विस्थापित गर्ने गरी सरकारले आगामी आर्थिक वर्षका लागि १ अर्ब बजेट विनियोन गरेको छ । स्थानीय विकास मन्त्रालयका अनुसार अहिले ९ वटा झोलुङगे पुलले तुइन विस्थापन गर्ने काम भइरहेको छ र केही महिनामा सम्पन्न हुने छन् भने ४२ वटाको निर्माणका लागि बोलपत्र आह्वान भइसकेको छ भने १ सय १ वटाको डीपीआर तयार पार्ने काम भइरहेको छ ।

११) स्थानीय निकायमा गरिएको बजेट वृद्धि
ओली सरकारले आफ्नो गाउँ आफै बनाउँ भन्ने नारा सहित स्थानीय निकायमा जाने रकम वृद्धि गरेको छ । गाउँ विकास समितिले १५ देखि ५० लाख पाउँदै आएकामा उक्त रकम दोव्वर गरिएको छ । एमाले नेतृत्वको नौ महिने सरकारले २०५१ सालमा पहिलो पटक गाउँविकास समितिमा सिधै बजेट जाने व्यवस्था गरेको थियो ।

१२. अफगानमा मारिएका स्वादेश ल्याउने काम घाइते तथा घर फर्कन चाहनेहरुका लागि गरिएको उद्दार :
अफ्गानस्तानको कावुलमा आतङ्कारीको आक्रमणमा मारिएकाहरुको शव नेपाल ल्याउन तथा घाइतेहरुको उद्दारमा गरेको काम ओली सरकारले गरेको अर्को महत्वपूर्ण कामका रुपमा लिइने गरिन्छ । आतककारीको आक्रमणमा मारिएकाहरुको शव नेपाल ल्याउन उनले तत्कालै पहल गरेका थिए । २४ घण्टाभीत्रै मारिएकाहरुको शव उनीहरुका आफन्तहरुले बुझेका थिए भने प्रधानमन्त्री स्वयम विमानस्थलमा पुगेर शव बुझ्नुका साथै पीडित परिवारलाई शान्त्वना प्रदान गरेका थिए ।

 

समाचार

अर्थ

पर्यटन

सम्पर्क ठेगाना

  • राजमार्ग चौराहा, बुटबल रुपन्देही , लुम्विनी
  • ईमेल
  • info@lumbininews.com

    siddarthamedia2014@gmail.com

लुम्बिनी न्युज समुह

  • अध्यक्ष
  • - भवानी प्रसाद घिमिरे