काठमाडौं । जल उत्पन्न प्रकोप नियन्त्रण कार्यालय, लमही दाङका इन्जिनियर रामबहादुर रानाभाटविरुद्ध तीन करोड १५ लाख ८१ हजार ६६ रुपियाँ भ्रष्टाचार मुद्दा दायर भएको छ ।
अख्तियार दुरुपयोग अनुसन्धान आयोगका प्रवक्ता भोला दाहालका अनुसार रानाभाटले सार्वजनिक सेवामा स्थायी नियुक्ति लिएको मिति २०४६ हसार ३० देखि २०७९ मङ्सिर ६ गतेसम्मको समग्र आय तथा व्ययको विश्लेषण गर्दा सो भ्रष्टाचार भएको खुलेको छ ।
सो रकम बराबरको सम्पत्ति गैरकानूनी रुपमा आर्जन गरेकाले भ्रष्टाचार निवारण ऐन, २०५९ बमोजिम बिगो असुलको मागदाबीसहित विशेष अदालत काठमाडौंमा आरोपपत्र दायर भएको आयोगले जनाएको छ ।
अनुसन्धानको क्रममा निज र निजको परिवारले अमिल्दो र अस्वाभाविक जीवनस्तर यापन गरेको¸ आफ्नो हैसियतभन्दा बढी रकम बराबरको आफ्नो र परिवारको नाममा शेयर/जग्गा खरिद, अध्ययन खर्च, घर निर्माण तथा विभिन्न बैंक तथा वित्तीय संस्थाहरुमा रकम जम्मा गरेको देखिएको अख्तियारले जनाएको छ ।
