बुटवल । भन्सार छलेर ल्याएका सामानको सहयोग गर्न भन्दै व्यवसायीबाट १५ हजार रुपैयाँ घुस लिने रूपन्देहीका प्रहरी हबल्दार पक्राउ अख्तियारको नियन्त्रणमा परेका छन् ।
अख्तियार दुरुपयोग अनुसन्धान आयोगको टोलीले नवलपरासी भैरहवास्थित अस्थायी प्रहरी बिट बसपार्कमा कार्यरत प्रहरी हबल्दार डुकबहादुर खड्का बिहीबार साँझ पक्राउ गरेको हो ।
नवलपरासी सुस्तापश्चिमको भुजुवा प्रहरी चौकीमा दरबन्दी भएका खड्का नेपाल–भारत सिमानानजिक पर्ने भैरहवाको बसपार्कमा काजमा कार्यरत थिए ।
भारतको भगवानपुर नाका हुँदै भन्सार छलेर अवैध रूपमा सामान ल्याउन सहजीकरण गर्ने गरी उनले व्यवसायीबाट घुस मागेको उजुरी परेको थियो ।
सेवाग्राहीको उजुरीअनुसार अख्तियार दुरुपयोग अनुसन्धान कार्यालय बुटवलबाट खटिएको टोलीले उनलाई घुस रकम लिइसकेको अवस्थामा पक्राउ गरेको र थप अनुसन्धान भइरहेको अख्तियार दुरुपयोग आयोगका प्रवक्ता नरहरि घिमिरेले बताए ।
घिमिरेका अनुसार हबल्दार खड्कालाई रूपन्देहीको रोहिणी गाउँपालिका–३ स्थित सिमरहाचोक नजिकबाट नियन्त्रणमा लिइएको थियो ।
