गुल्मी । बाँदर र बनेललगायतका वन्यजन्तुको बढ्दो आतंकका कारण बस्ती नै स्थानान्तरण गर्नुपर्ने माग उठेपछि गुल्मीका जनप्रतिनिधि गम्भीर बनेका छन् ।
प्रतिनिधिसभा सदस्य, जिल्ला समन्वय समिति प्रमुख तथा स्थानीय तहका प्रमुखबीच सम्पन्न भर्चुअल बैठकमा यस विषयमा विशेष छलफल गरिएको हो । बैठकमा गुल्मी–१ का सांसद सागर ढकाल, गुल्मी–२ का सांसद गोविन्द पन्थी, जिल्ला समन्वय समिति प्रमुख द्रोणबहादुर खत्रीलगायत सहभागीले वन्यजन्तुका कारण जनजीवनमा परेको असरबारे चिन्ता व्यक्त गरेका थिए ।
बैठकपछि सार्वजनिक निष्कर्षमा बाँदर र बनेलको अत्यधिक आतंकले खेतीपाती नष्ट हुनुका साथै बस्ती नै सार्नुपर्ने विकल्पमा कुराकानी भएको छ । यस्तो गम्भीर समस्याको दीर्घकालीन समाधानका लागि तत्काल प्रभावकारी नीति तथा कार्यक्रम ल्याउन संघीय सरकारसँग माग गरिएको जिल्ला समन्वय समिति प्रमुख द्रोणबहादुर खत्रीले बताए ।
बैठकले जिल्लाका अन्य विकासका मुद्दामा पनि ध्यान केन्द्रित गरेको छ । छलफलका क्रममा स्थानीय तहमा निर्माण भएका १५ शैयाका अस्पताल सञ्चालनका लागि विशेषज्ञ चिकित्सक र आवश्यक जनशक्ति अभाव रहेको भन्दै संघ सरकारको विशेष पहल आवश्यक रहेको निष्कर्ष निकालिएको छ ।
खानेपानी आयोजनामा न्यून बजेट विनियोजनका कारण वर्षौंदेखि समस्या समाधान हुन नसकेको, बर्खायाम नजिकिँदै गर्दा अधुरा रहेका पुल तथा सडक जोखिमपूर्ण अवस्थामा रहेको भन्दै तत्काल बजेट व्यवस्था गर्नुपर्नेमा जोड दिइएको छ ।
त्यसैगरी ‘एक पालिका–एक पकेट’ कार्यक्रममार्फत कृषि उत्पादन र रोजगारी सिर्जना, ठेकेदारको ढिलासुस्ती र गुणस्तरहीन काममा कडाइ, सार्वजनिक खरिद ऐन संशोधन, सिँचाइ तथा सडक आयोजनामा पर्याप्त बजेट विनियोजन, कर्मचारी अभाव पूर्ति लगायतका विषयमा पनि सहमति भएको छ ।
जनप्रतिनिधिहरूले यी सबै समस्याको समाधानका लागि संघीय सरकारसँग समन्वय गर्दै प्रभावकारी पहल गर्ने प्रतिबद्धता जनाएका छन् ।
