बुटवल । तिलोत्तमा नगरपालिका–७ स्थित गौतमबुद्ध माध्यमिक विद्यालयको आयोजनामा वातावरण तथा सामाजिक जनचेतना सम्बन्धी सडक नाटक प्रतियोगिता सम्पन्न भएको छ ।
तिलोत्तमा नगरपालिकाको शिक्षा शाखाको ‘एक विद्यालय, एक सिर्जनशील कार्यक्रम’ अन्तरगत प्रतियोगिता गरिएको हो ।
प्रतियोगितामा बोल्दै शिक्षा शाखाका प्रमुख गंगाराम आचार्यले बालबालिकालाई पढाइलेखाईमा मात्र नभई हरेक क्रियाकलापहरुमा सक्षम र सबल बनाउन विद्यालय तहदेखिनै यस्ता कार्यक्रमको आवश्यकता पर्ने बताए । उनले जित मात्र नभई हारले भोलीको जितको ढोका खुल्ने बताए ।
विद्यालयका प्रधानाध्यापक मृगेन्द्र रिजालले प्रतिस्पर्धाले नगरका विद्यार्थीहरुको सम्बन्ध प्रगाढ हुनुका साथै उनीहरुको सर्वाङगिण विकासमा भुमिका खेल्ने बताए ।
यस्तै विद्यालय व्यवस्थापन समितिका अध्यक्ष गणेशप्रसाद शर्मा न्यौपानेले अन्तर माध्यमिक विद्यालयबीच हुने सडक नाटक प्रतिस्पर्धाले कला प्रस्फुटनमा मद्धत पुग्ने बताए ।
१५ समृहको सहभागिता रहेको सडक नाटक प्रतियोगितामा दुर्गादत्त मावि शंकरनगर प्रथम, नवज्योती मावि डिंगरनगर द्धितिय, शान्ती नमुना मावि तृतिय र गौतमबुद्ध सामुदायिक विद्यालय सान्तवना स्थान प्राप्त गरेका छन् ।
