बर्दिया । बर्दियामा चिसोबाट जोगिन आगो ताप्दै गर्दा एक्कासी आगो सल्केर गम्भीर घाइते भएकी एक महिलाको आइतबार बिहान मृत्यु भएको छ ।
बर्दिया मधुवन नगरपालिका–४ बसन्ता भुल्लनचोक स्थित घरको बरन्डामा आगो तापिरहेकी ८७ वर्षीया चिन्की थरुनी मृत्यु भएको जिल्ला प्रहरी कार्यालय बर्दियाका सूचना अधिकारी डीएसपी तिलकराम अर्यालले बताए ।
आगलागी बिहान ३ बजे भएपनि बिहान साढे ५ बजे जानकारी पाएपछि घटनास्थलमा प्रहरी पुगेको उनले जनाए । घटनाबारे अनुसन्धान भइरहेको प्रहरीले जनायो । यस वर्ष जाडोयाम सुरु भएयता आगो ताप्ने क्रममा बर्दियामा सात जनाको ज्यान गइसकेको प्रहरीले जनाएको छ ।
