रुपन्देही । जापान गोजुरियो कराँते डो मिसन सङ्घको आयोजनामा दोस्रो संस्करणको एमजीके दोस्रो अन्तर्राष्ट्रिय कराँते च्याम्पिएनसिप रुपन्देहीमा शुक्रबारदेखि सुरु भएको छ ।
‘राष्ट्रका लागि खेलकुद, स्वास्थ्यका लागि खेलकुद’ भन्ने नाराका साथ शङ्करपुरमा सुरु भएको प्रतियोगिताको पहिलो दिन कुमुतेतर्फ गरी सात स्वर्णको छिनोफानो भएको छ ।
कुमुतेतर्फ पुरुषमा दुई र महिलामा पाँच स्वर्णको छिनोफानो हुँदा नेपालले छ स्वर्ण हात पारेको छ । त्यस्तै भारतले एक स्वर्ण र भूटानले रजत पदक जितेको छ ।
शङ्करपुरस्थित गाउँले ससुराली होटलको हलमा आयोजित प्रतियोगितामा महिलातर्फ २५, ३०, ३५, ६० र ४५ केजीमुनि तौल समूह र पुरुष ३० र ४० केजमुनि तौल समूहमा प्रतिस्पर्धा भएको थियो । पुरुष ३५ केजीमुनि तौल समूहमा नेपालका सुजन भण्डारीले स्वर्ण हात पारी नेपालका लागि खाता खोल्नुभएको आयोजक संस्थाका उमेश थापाले जानकारी दिए ।
प्रतियोगितामा पुरुष २५, २७, ३०, ३५, ४०, ४५, ५०, ५५, ६०, ६८ र ७५ केजीमुनि तौल समूह तथा महिलाका लागि २५, ३०, ३५,४०, ४५, ५०, ५५, ६१ र ६८ केजीमुनि तौल समूहमा प्रतिस्पर्धा भइरहेको छ । कातातर्फ महिला र पुरुष आठ र नौ वर्ष तथा १० देखि १३ वर्ष उमेर समूहमा प्रतिस्पर्धा हुने आयोजक संस्था जापान गोजुरियो मिसन डो सङ्घका प्रमुख प्रशिक्षक काजी रानाले जानकारी दिए ।
यसअघि प्रतियोगिताको उद्घाटन गर्दै तिलोत्तमा नगरपालिकाका प्रमुख रामकृष्ण खाणले खेलकुदको विकास र विस्तारलाई अझै प्राथमिकतामा दिनुपर्ने बताए ।
पछिल्लो समय खेलप्रति आम नागरिकको चासो बढेको जनाउँदै उनले खेलाडीलाई आर्थिकरूपमा आत्मनिर्भर हुन र युवालाई कुलतबाट जोगाउन खेलकुदको विकास अपरिहार्य रहेकामा जोड दिए ।
उपप्रमुख जगेश्वरीदेवी चौधरीले खेलकुद व्यक्तिको स्वास्थ्यसँग जोडिएकाले यसको विकासमा नगरपालिका प्रतिबद्ध रहेको बताइन् ।
दुई दिनसम्म हुने प्रतियोगितामा नेपाल, भारत र भूटानका गरी करिब दुई सय सय खेलाडी सहभागी रहेको आयोजक संस्था जापान गोजुरियो मिसन डो सङ्घका प्रमुख प्रशिक्षक काजी रानाले जानकारी दिए ।
प्रतियोगिता सुरु हुनुपूर्व स्थानीय टोल विकास समिति, आमा समूह र खेलाडीसहित विभिन्न झाँकीसहितको र्याली निकालिएको थियो । –रासस
