दाङ । दाङमा आगलागीमा परेर जल्दा एक जनाको मृत्यु भएको छ। जिल्लाको लमही नगरपालिका–९ तरुलियाका ८६ वर्षीय बीर बहादुर बोटेको आफ्नै घरमा लागेको आगोमा परेर जल्दा मृत्यु भएको हो ।
आगलागी भएको समयमा घरभित्र रहेका अत्यावश्यक कागजात लिन गएका बेला बोटे आगोको चपेटामा परेका उनका नाति राजेन्द्र बोटेले बताए।
मृतक वीरबहादुर बोटेको गोठबाट सल्किएको आगोले उनको एक घर हुँदै भतिजा पर्ने हुकुमबहादुर बोटेको एक घर गरि दुई घर एक गोठ जलेर नष्ट भएको इलाका प्रहरी कार्यालय अमिलियाका प्रहरी निरीक्षक लाल बहादुर श्रेष्ठले जानकारी दिए।
बिहिवार अपरान्ह ३ बजेको समयमा एक्कासी आगलागी भएको थियो। आगलागीबाट तीन वटा घर गोठ जलेर नष्ट भएका छन्। घर भित्र रहेको कुनै सामान निकाल्न नपाएको पिडितहरुले बताएका छन्।
आगलागी भएलगत्तै लमही नगरपालिकाका उपप्रमुख लक्ष्मी योगी, वडा नम्बर ९ का वडा अध्यक्ष भेष बहादुर केसी, वडा नम्बर ५ का वडा सदस्य केशव अधिकारी घटनास्थल पुगेका थिए।
लमही नगरपालिका र गढवा गाउँपालिकाको दमकल, प्रहरी, सशस्त्र प्रहरी र स्थानीयको सक्रियतामा आगो नियन्त्रणमा आएको थियो।
